I.
Miha Živić je odvezal od jasâl svojèga vola
Jedinca Jelèna;
Okôlo rogôv namòtal mu venj’c lancôv.
Oprtil je torbo s pogačó i ljukom;
Ní poglèdal ženo,
Ní se mog’l obrnit k žalòsne decé –
Polahko prekrižil se
I pomìslel:
Zake moram prodat ranìtelja svojèga
Zake ní sena na hiše
Zake so deca gladna
Zake je žena gola i bosa?
Ali kada je hodil po potu za Jelenòvem tragóm
Malo se razvesèlil i nasmejâl:
Deca so bila sita,
Obuta i oblečèna,
A žena je dela na se kupovnó oblêko
I rob’c šar –
Pa gre iz štacuna vesèla:
Na roka nosí
Pakete mûke
Mastí
Cukra
Kafe
I za njega v žepu prgìšče cigarêt;
A Jòžice je zela skrivèčke čokolado.
Trgov’c jo prijàzno pozdrâvlja.
II.
Domó se vrnil pred mrak
Vesel
Prevesel:
Bilo mu je v srcu toplo od vina:
Na sè je pozâbil –
Na ženo
Obùčo
Oblêko
Na čokolado.
I teškèga lanca ní očutil,
Ke ga je snel iz prodanèga vola
I prek ramèna okôlo sebe zakvàčil –
V srcu, v očé, v glasu
Se smejàlo vino:
Zapopêval je na potu.
III.
Gorela je sveča na stolu v hiše.
Gorèle so ženìne oči nad njim
Od straha
Od jada
I toge.
Nestàlo je lažljivèga veselja
Ko sna:
Bi li ju rekl zake se napíl?
Ke bi bilo da je nekòmo
Presekl vrat
I pustil drob!
Mislel je:
Zake je tako na svetu?
I nazad se k žene vrnil,
Tel ju reč da ima za jelo novâc,
A trgòvcu ke so dožni pratìli bodo;
Ne bo ni nam vàvêk črno pred očé!
Ali niš ní rekl;
Na krevet je pal teško ko kàman
Vu vodo
Glibòko
Zelèno:
Gre Jelen pred njim –
Zlati so mu rogi,
Zlati so mu papki
I lan’c mu srebrn okôlo rogôv
Svît
Ko kruna.
Kulìko novâc, kulìko novâc bomo dobìli!
Odgovori