Susedovo dete

Zakaj, sused, tak zapiraš
Te visoke lese,
Kaj si v strahu, da ti zlato
Negdo ne odnese?

Zakaj su pri tebi cucki,
Kak pri nikom, hudi?
Znam, ti imaš dete lepo,
Da se vsaki čudi.

Nikomu ne daš pogledet
Malo, belo lice,
Zato si zasadil vsigde
Guste te živice.

Ali onde, dragi sused,
Gde je hižna streha,
Kaj ne čuješ one glase,
Kak od tihog smeha?

Z golubicom guče golub;
Imaju se radi,
Kaj veliju, to ti znaju
Ljudi, dok su mladi.

A i tvoje lepo dete
Rada si ih čuje.
Tak je ona onda čudna,
Kak da kaj žaluje.

A na večer, kad se leje
Svetlo mesečine,
S postelje skrivečki ona
Stane se i zgine.

– Rano v zorju, kad se vrne,
Bledo joj je lice. –
Sused, ti zabadav imaš
Lese i živice!

Zbirka: Kipci i popevke
Objavljeno: 1917.